غلطتين بتعملها كل ما تطبع وانت مش واخد بالك
في الأول هتفتكر الموضوع سهل بس هو فعلاً بيأثر على الريزن وبكلمك في مشاكل واقعية قابلت العملاء.
الغلطة الأولى: التنضيف بجانب الـ Vat
لو بتنضف البارتات الريزن المطبوعة ببخاخة كحول قدام الـ Vat، فممكن وأنت مش قصدك ييجي على الريزن كحول ودا بطبعه هيبوظ الريزن كـ سائل لأنه هيغير في تركيبته الكيميائية وغير إنه ممكن يفصله كمان من بعضه ويبقي طبقات مختلفة.
أو لو بتنضف السابورت (Support) والبرنتر مفتوحة، ممكن قطعة تطير وتنزل في الريزن وتيجي تطبع وأنت متطمن تلاقي الشاشة باظت.
دايماً خلي البرنتر في مكان والتنضيف في مكان أبعد شوية.
تاني غلطة: مكان البرنتر والشمس
تيجي تطبع تلاقي الريزن فيه مشكلة وحصل تشوه للبارت وأنت ظابط كل إعداداتك وتكلم دا وتبحث وتدور ومفيش حل.
ودا في بعض الحالات بيكون بسبب إنك سايب البرنتر الريزن بتاعتك جنب شباك والشمس بتيجي عليها، ودا في حد ذاته بيأثر على الريزن بسبب الـ UV الموجودة في أشعة الشمس اللي بتعمل على تصليب جزيئات الريزن وبالتالي تأثر على خواصه.
خلي بالك من الأخطاء البسيطة دي لأنك صعب تدركها إلا من خلال تجارب كتير من عملائنا.
